Музей “Гісторыя роднай вёскі”
22 красавіка 1988 года ўрачыста адкрыўся музей “Гісторыя роднай вёскі” ў Барздоўскай сярэдняй школе Аршанскага раёна. Ідэя стварэння музей ўзнікла ў настаўнікаў і вучняў у 1980 годзе, і на працягу васьмі год ішоў інтэнсіўны збор экспанатаў і матэрыялаў для экспазіцыі будучага музея.
Вёска Барздоўка… Не на кожнай карце Беларусі можна ўбачыць назву і месцазнаходжанне гэтага геаграфічнага пункта. Вёска размясцілася на паўднёвым усходзе Аршанскага райна на мяжы Віцебскай і Магілёўскай абласцей, а таксама на стыку трох раёнаў: Аршанскага, Дубровенскага і Горацкага. Гэта вёска нічым не адрозніваецца ад соцен і тысяч падобных вёсак на тэрыторыі нашай Рэспублікі Беларусь, але яна мае сваю гісторыю, адзіную і непадобную на гісторыю іншых вёсак.
Першае дакументальнае пасведчанне пра вёску адносіцца да 1672 года ў “Інвентары Дубровенскага графства”, які захоўваецца ў Дзяржаўным архіве Рэспублікі Беларусь у Мінску. Другі дакумент, 1707 года, распавядае аб тым, як вёска Барздоўка была прададзена панамі Пацеевымі пад заклад 500 бітых талераў пану Яну Бародзічу. Гэты дакумент быў адшуканы ў Дзяржаўным архіве Літвы ў кнізе старажытных актаў і складзены на польскай мове. Аб тым, што вёску ў канцы XVIII стагоддзя абступалі неабсяжныя лясы і пушчы, відаць з “Атласа Могилевского наместничества”, складзенага ў 1784 годзе.
Музей мае копіі дакументаў XVIII-XX стагоддзяў, звязаных з гісторыяй вёскі, якія ўзяты з архіваў Мінска, Вільнюса, Санкт-Пецярбурга, Віцебска, Оршы, відэатэку фільмаў па гісторыі Беларусі і Аршаншчыны, касеты з ўапісамі фальклорных песен, легенд і паданняў, бібліятэчку краязнаўчай літаратуры па Аршаншчыне. Музей налічвае некалькі соцен экспанатаў, сярод якіх калекцыя самавараў, прылад працы, ручнікоў, глінянага посуду, нумізматычную калекцыю. Пачэснае месца ў экспазіцыі музея займаюць матэрыялы пра знакамітых землякоў: Герояў Савецкага Саюза і Сацыялістычнай працы А.Д. Салянікава і М.Я. Шарснёва, аб воінах-земляках, якія не вярнуліся з вайны.
Экспазіцыя музея ўключае наступныя раздзелы:
- “Вёска ў канцы XIX-пачатку XX ст.”
- “Калектывізацыя”
- “Нашы землякі-удзельнікі Вялікай Айчынай вайны”
- “Летапіс школы”
Музей неаднаразова удзельнічаў у рэспубліканскіх, абласных і раённых аглядах і конкурсах краязнаўчых музеяў школ, па выніках якіх быў адзначаны дыпломамі і ўзнагародамі.
Кіруе работай музея настаўнік Пячонкін Валерый Георгіевіч.
Прэзентацыя музея "Гісторыя роднай вёскі"
